Hús, sýning á nýjum og eldri verkum eftir Hrein Friðfinnsson, verður opnuð í Sverrissal Hafnarborgar laugardaginn 12. maí kl. 15. Sýnd verða ljósmyndaverkin House Project, Annað hús og Þriðja hús. Elsta verkið, House Project, er frá 1974 og er á meðal þekktari verka Hreins en Þriðja hús er nýtt verk sem nú er sýnt í fyrsta skipti. Verkin tengjast öll hvert öðru en hafa ekki fyrr verið sýnd saman.
Hreinn vann House Project árið 1974 en þá byggði hann hús í hrauninu sunnan Hafnarfjarðar, innblásið af frásögn Þórbergs Þórðarsonar af Sólon Guðmundssyni á Ísafirði. Húsið var byggt á röngunni og innihélt þannig allan heiminn utan sjálft sig. Hreinn vann síðan aðra útgáfu af húsinu og var hún reist í skúlptúrgarði í Frakklandi árið 2008. Það hús er speglun fyrsta hússins þannig að hið ytra sneri að veröldinni en inni var veröldin sjálf. Inni í húsinu svífur loftsteinn sem nokkurskonar fulltrúi alheimsins og á honum er líkan af fyrsta húsinu byggt úr mjóum vír. Síðsumars árið 2011 mátti síðan greina útlínur húss á ferðalagi um hraunið sunnan Hafnarfjarðar. Áfangastaðurinn var hóllinn þar sem fyrsta húsið stóð árið 1974. Þarna var komin enn ein útgáfa hússins, stækkuð endurgerð vírmódelsins innan úr húsinu í Frakklandi. Áfangastaður hússins sem var borið í gegnum hraunið árið 2011 var þannig jafnframt uppruni þess. Húsin eru spegilmyndir hvers annar, fela í sér alla veröldina um leið og þau loka hana úti. Texta og ljósmyndaverkin á sýningunni í Hafnarborg eru byggð á þessum húsum en húsin sjálf eru ýmist sýnileg sem skúlptúr í Frakklandi eða orðin að leyndarmáli eða goðsögn í hrauninu sunnan Hafnarfjarðar.
Hreinn Friðfinnsson er á meðal þeirra íslensku listamanna sem öðlast hafa mesta viðurkenningu alþjóðlega. Hann hefur sýnt á einkasýningum og samsýningum um allan heim. Yfirlitssýning á verkum hans var í Serpentine Gallery í London og Listasafni Reykjavíkur 2007 – 2008. Verk eftir Hrein eru í eigu fjölda opinberra safna og einkasafna, þar á meðal er verkið House Project sem er í eigu Moderna Museet í Stokkhólmi. Hreinn tók þátt í stofnun SÚM hópsins á 7. áratugnum og er einn af leiðandi listamönnum íslenskrar konseptlistar. Hreinn fæddist í Dölunum árið 1943 og stundaði nám við Myndlista- og handíðaskóla Íslands á árunum 1958-60. Hreinn hefur frá 1971 búið og starfað í Amsterdam, en þrátt fyrir það má hvarvetna greina áhrif hans og mikilvægi fyrir íslenska myndlist.
Í tilefni sýningarinnar gefur Hafnarborg í samstarfi við bókaútgáfuna Crymogeu út bók þar sem finna má myndir af verkunum og af gerð þeirra auk texta eftir franska listfræðinginn Frédéric Paul og Ólöfu K. Sigurðardóttur, sýningarstjóra sýningarinnar og forstöðumann Hafnarborgar. Hönnuður bókarinnar er Ármann Agnarsson.
Like this:
Be the first to like this post.
