Endemi kemur út í annað sinn laugardaginn 19. Nóvember. Samhliða útgáfu blaðsins verður opnun sýningarinnar Endemis (ó)sýn, í efri sölum Gerðarsafns í Kópavogi, milli klukkan þrjú og fimm næstkomandi laugardag.
Sýningin stendur frá 19.nóvember 2011 til 8. janúar 2012.
This slideshow requires JavaScript.
Íslenskir listamenn hafa tekið Endemi einstaklega vel og höfum við verið svo lánsamar að fá til liðs við okkur marga af helstu listamönnum landsins. Þau sem eiga verk á sýningunni í Gerðarsafni eru:
Anna Líndal
Ásta Ólafsdóttir
Guðrún Hrönn Ragnarsdóttir
Eva Ísleifsdóttir
Margrét H. Blöndal
Katrín Sigurðardóttir
Ingibjörg Jónsdóttir
Elín Hansdóttir
Þorvaldur Jónsson
Sara Björnsdóttir
Gjörningaklúbburinn
Greg Barrett
Birgir Snæbjörn Birgisson
Jóhanna Kristbjörg Sigurðardóttir
Á opnuninni mun Fríða Björk Ingvarsdóttir halda tölu og Þráinn Hjálmarsson ásamt Inga Garðari Erlendssyni verða með Þránófónaperformans.
Sýningarstjórar eru: Ragnhildur Jóhanns og Selma Hreggviðsdóttir
Nafn sýningarinnar, Endemis(Ó)sýn, fáum við að láni frá Hlyni Helgasyni sem skrifar inngangsgrein blaðsins. Orðið (ó)sýn vísar til hins kvenlæga og sértæka sem fellur gjarnan utan hins hefðbundna ramma. Með þessari framsetningu beinir hann augum lesenda að því að sú „sýn“ sem liggur til grundvallar sýn-inga á oftar en ekki rætur sínar í ríkjandi samfélagsviðmiðum og -gildum sem eru, og hafa alla tíð verið, karllæg.
Erfitt er að skilgreina hvað flokkast sem karllægt og kvenlægt þegar kemur að myndlist. Margar konur hafa haslað sér völl innan hins ákvarðandi, greinandi og afgerandi ramma „sýnarinnar“ á meðan ófáir karlmenn upplifa sig á jaðri hinnar sértæku kvenlægu (ó)sýnar.
Til að undirstrika þessa (ó)sýn er öðrum hugtökum, eða réttar sagt hlutföllum, snúið á hvolf. Í blaðinu sem og á sýningunni eru 30% sýnenda karlmenn og 70% konur. En hlutfallið 30/70 (karlmönnum í vil) hefur um langa hríð virst órjúfanlegur múr þegar kemur að sýningum og umfjöllun um myndlist.
